Нүүрсний хэрэгтнүүд суллагдахад 23 хоног үлдлээ
 
Энэ мэдээ хуучирсан буюу 2023/02/15-нд нийтлэгдсэн мэдээ болно.
Ангилал
Улс төр
Огноо
Унших
8 минут 3 секунд

Нүүрсний хэрэгтнүүд суллагдахад 23 хоног үлдлээ

Нүүрсний хулгайн хэрэгт хамааралтай хүмүүсийн шалгалтын ажил дуусаагүй гэдгийг Хууль зүй дотоод хэргийн сайд Х.Нямбаатар мэдэгдсэн.

Нүүрсний эрүүгийн хэрэгт 50 гаруй хүнийг холбогдогчоор татаж цагдаагаас шалгаж буй.

Тэгвэл эдгээр нэр холбогдсон хүмүүсээс дуулиантай саатуулагдсан, яллагдагчаар татагдсан зарим хүнийг цаашид үргэлжлүүлэн хорих эсэх нь олны анхаарлын төвд байна. Өнөөдрийн байдлаар нүүрсний хэргээр долоон хүнийг хоригдсон байгаа бөгөөд олонд ил болсон хоёр хүний хорих хугацааг тус бүр дахин нэг сараар сунгасан.

Б.ГАНХУЯГ ГУРАВДУГААР САРЫН 7-НД СУЛЛАГДАНА

УИХ-ын гишүүн Т.Аюурсайхан, түүнтэй ойрын харилцаа холбоотой гэх "Эрдэнэс Тавантолгой" компанийн захирал асан Б.Ганхуяг, "Эрдэнэс Тавантолгой” ХК-ийн Дотоод хяналт эрсдэлийн удирдлагын газрын захирал асан Х.Нурлат нарын сүлжээ. Авлигатай тэмцэх газар Хөдөлмөр нийгмийн хамгааллын сайд Т..Аюурсайханаас гэрчийн мэдүүлэг авч, яллагдагчаар татсан талаар мэдэгдсэн. Гэхдээ шалгалын ажил дуусаагүй учир тоймтой хариулт хэлээгүй.

Шүүхээс өнгөрсөн оны арванхоёрдугаар сард Х.Нурлатыг нүүрсний хулгайн хэрэгт холбогдуулан цагдан хорих шийдвэрийг гаргасан. Түүнийг “Тавантолгой түлш” ХХК-тай нүүрсний тээвэрлэлтийн бизнес эрхэлж, хамтран орлого олж, хууль бусаар хөрөнгөжсөн, “Онлайн ложистикс” ХХК-ийг үүсгэн байгуулж, өөртөө болон бусдад давуу байдал бий болгосон байж болзошгүй гэх үндэслэлээр яллагдагчаар татан шалгаж байгаа юм.

Тэгвэл яллагдагч Х.Нурлатыг шүүхээс эрүүл мэндийн шалтгааныг нь харгалзан үзэж батлан даалтад гаргаж, суллах шийдвэрийг өнгөрсөн нэгдүгээр сарын 10-нд гаргажээ. Одоогоор дахин саатуулах эсэх шийдвэр байна.

Харин Б.Ганхуягийг нүүрсний хэрэгт холбоотойгоор цагдан хорих хугацааг сунгах саналыг Нийслэлийн прокурорын газраас Чингэлтэй дүүргийн эрүүгийн хэргийн анхан шатны шүүхэд хүргүүлж, өнгөрсөн сарын 3-нд шүүхээс түүнийг үргэлжлүүлэн нэг сар цагдан хорихоор шийдвэрлэсэн билээ.

Тэгвэл энэ сарын 7-нд түүнийг хорих хугацааг үргэлжлүүлэн нэг сараар сунгасан.

“Эрдэнэс Тавантолгой” ХК-ийн захирал асан Б.Ганхуяг нь эрх мэдэл албан тушаалын байдлаа урвуулан ашиглаж давуу байдал бий болгосон, хахууль авсан, хууль бусаар олсон орлогоо хөрөнгө оруулалт нэрээр халхавчлан мөнгө угааж, үндэслэлгүйгээр хөрөнгөжсөн байж болзошгүй гэх хэрэгт Эрүүгийн хуулийн 22.4 дүгээр зүйлийн 4 /Хахууль авах/, 22.10 дугаар зүйлийн 1/Үндэслэлгүйгээр хөрөнгөжих/, 18.6 дугаар зүйлийн 2.2, 2.3-т /Мөнгө угаах/ зааснаар яллагдагчаар татагдаад байгаа.

С.БАТДӨЛИЙГ ЦАГДАН ХОРИХ ХУГАЦААГ СУНГАСАН НЬ ХЭРГИЙН ЭЭДРЭЭТЭЙ БАЙДАЛТАЙ ХОЛБООТОЙ

УБТЗ-ын Тээвэр зохион байгуулалтын албаны орлогч дарга С.Батдөлийг нэгдүгээр сарын 6-ны өдөр саатуулж, сулласан ч гурав хоногийн дараа сарын хугацаатай хорих шийдвэр гарсан. Тодруулбал, Нийслэлийн прокуророос С.Батдөлийг яллагдагчаар татаж, нэг сарын хугацаагаар цагдан хорих таслан сэргийлэх арга хэмжээ авхуулах тухай саналыг Баянгол дүүргийн Эрүүгийн хэргийн анхан шатны шүүхэд 2023 оны нэгдүгээр сарын 6-нд хүргүүлсэн байдаг. Баянгол дүүргийн эрүүгийн хэргийн анхан шатны шүүх нийслэлийн прокурор М.Энхбаатар, яллагдагч С.Батдөл түүний өмгөөлөгч Д.Амаржаргал нарыг оролцуулан хянан хэлэлцээд, С.Батдөлийг сарын хугацаагаар цагдан хорихоор шийдвэрлэсэн юм.

Түүнийг цагдан хорих хугацаа энэ сарын 9-нд дуусах байсан ч Нийслэлийн прокурорын газраас цагдан хорих хугацааг нэг сарын хугацаагаар сунгуулах тухай саналыг Баянгол дүүргийн Эрүүгийн хэргийн анхан шатны шүүх хоёрдугаар сарын 06-ны өдөр хүлээн авч, 08-нд хорих хугацааг дахин сунгасан.

Нийслэлийн прокурор, яллагдагчийн өмгөөлөгч нарыг оролцуулан хянан хэлэлцээд Эрүүгийн хэрэг хянан шийдвэрлэх тухай хуулийн 14.10 дугаар зүйлийн 2 дахь хэсэгт “Хэргийн ээдрээ төвөгтэй байдлыг харгалзан яллагдагчийг цаашид цагдан хорих…” гэсэн заалтыг үндэслэн яллагдагч С.Батдөлийн цагдан хорих хугацааг 30 хоногийн хугацаагаар сунгаж шийдвэрлэсэн юм.

С.Батдөлийг 2018 оноос эхлэн үл хөдлөх хөрөнгө худалдан борлуулж олсон орлогоос их хэмжээний татварт ноогдох орлого буюу 700 орчим сая төгрөгийг Баянгол дүүргийн 25 дугаар хорооны нутаг дэвсгэрт байрлах орон сууцанд болон өөрийн гэртээ нууж татвар төлөхөөс зайлсхийсэн гэмт хэргийг үйлдсэн үйлдэлд, мөн татвар төлөхөөс зайлсхийсэн гэмт хэргийн улмаас олсон орлого болох 7,3 тэрбум төгрөгийг мэдсээр байж түүнийг ашигласан, түүний хууль бус эх үүсвэрийг нуун далдлах зорилгоор 2022 онд хөдлөх болон үл хөдлөх эд хөрөнгө худалдан авах зэргээр өөрчилж байнга тогтвортой мөнгө угаасан гэмт хэрэг үйлдсэн гэх үйлдэлд нь яллагдагчаар татсан.

С.Батдөлд Эрүүгийн хуулийн тусгай ангийн 18.3 дугаар зүйлийн нэг дэх хэсэг /Татвараас зайлсхийх/ мөн хуулийн 18.6 дугаар зүйлийн 2 дахь хэсгийн 2.2 дахь / Мөнгө угаах/ заалтад зааснаар эрүүгийн хэрэг үүсгэн, мөрдөн байцаалтын ажиллагааг үргэлжлүүлэн явуулж байгаа аж.

ХОЛБОГДОГЧДЫН ШАЛГАЛТЫН АЖИЛ ДУУСААГҮЙ

АТГ-ын Мөрдөн шалгах хэлтсийн ахлах мөрдөгч Б.Батбилэг "Нүүрсний хэрэг, төмөр зам, С зөвшөөрөлтэй холбоотой хэргийг мөрдөн шалгахаар 2022 онд улсын Ерөнхий прокурорын тогтоолоор гурван байгууллагын хамтарсан ажлын хэсгийг байгуулсан. Уг ажлын хэсэг өргөн цар хүрээтэй ажиллах учраас мөрдөгчдийн тоог нэмэх шаардлагатай болсон. Одоо ажлын хэсэг хэрэг бүртгэлтийн 25, мөрдөн байцаалтын 11 гээд нийт 36 хэргийг мөрдөн шалгаж байна. Гурван хэргийн мөрдөн шалгах ажиллагааг дуусгаж, яллах дүгнэлт үйлдүүлэхээр прокурорын байгууллагад шилжүүлсэн. Хэргийг шалгах хүрээнд 127 объектод нэгжлэг хийж, хүний бие, эд зүйл, баримт бичигт үзлэг хийх ажиллагааг 246 удаа, 421 хүнээс мэдүүлэг авч, 640 баримт материалыг холбогдох байгууллагаас гаргуулсан.

Одоогийн байдлаар 66 иргэн, албан тушаалтанд эрүүгийн хэрэг үүсгэн яллагдагчаар татсан бөгөөд 26 хүнийг шүүхийн зөвшөөрөлгүйгээр хойшлуулашгүй тохиолдолд баривчилж, холбогдох шүүхэд танилцуулсан.

Хэргийг шалгах явцад 15 яллагдагчид Эрүүгийн хуульд зааснаар цагдан хорих арга хэмжээ авснаас одоо долоон хүнийг цагдан хорьж байна. Мөн улсын хилээр гарах хоригийг 19 хүнд, албан үүргийг биелүүлэхийг түдгэлзүүлэх арга хэмжээг таван хүнд, хувийн баталгаа авах таслан сэргийлэх арга хэмжээг 35 яллагдагч авсан” гэсэн юм.

Ийнхүү тус хэргийн шалгалтын ажил дуусаагүй бөгөөд гэрчүүдээс авсан мэдүүлэг, бусад нотлох баримт зэргээс шалтгаалж холбогдогчдын хүрээ тэлж байгааг АТГ мэдэгдсэн. Тиймээс мөрдөн шалгалт явуулахад тодорхой хугацаа шаардлагатайг онцоллоо. Ямартай ч тус хэрэгт холбогдсон зарим хүний хорих хугацааг үргэлжлүүлэн сунгаж байгаа нь учиртай!

Төрөөс 13 тэрбум төгрөг гаргаж, 5.5 сая үхрийг ээмэгжүүлэх нь зөв, буруу
Төрөөс 13 тэрбум төгрөг гаргаж, 5.5 сая үхрийг ээмэгжүүлэх нь зөв, буруу
 
Москвагийн халдлагын үеэр 100 гаруй хүн сураггүй алга болжээ
Москвагийн халдлагын үеэр 100 гаруй хүн сураггүй алга болжээ
Энэ мэдээ хуучирсан буюу 2023/02/15-нд нийтлэгдсэн мэдээ болно.