Хүнс хөдөө аж ахуй, хөнгөн үйлдвэрийн яамны харьяа Хөдөө аж ахуйн бирж зуданд өртсөн малчдаас хонийг 40 мянган төгрөгөөр хямдруулан авч байна гэх мэдээлэл олон нийтийн цахим сүлжээнд нийтлэгдсэн. Тус мэдээллийг худал бөгөөд ХАА-н бирж нь мал, мах худалдагч, худалдан авагчийн зуучлан холбох үүрэгтэй биржийн байгууллага гэдгийг өчигдөр онцолсон. Тэгвэл өнөөдөр Улсын онцгой комиссын хурлаар ХХААХҮ-ийн дэд сайд М.Ганхүлэг дараах хариултыг өгчээ.
Тэрбээр, Хөдөө аж ахуйн бирж үндсэндээ зохицуулах үйлчилгээтэй оролцож яваа. Үнийн хувьд худалдан авагч аж ахуйн нэгжүүд болон малчид хоорондоо тохиролцсоны үндсэнд гаргаж байгаа.
Тохиролцохдоо хэд хэдэн зүйлийг харгалзана. Өөрөөр хэлбэл тухайн газраас үйлдвэр хүртэлх зам, цас зудын нөхцөл байдал, малын хоргодлын тооцооллыг аж ахуй нэгжүүд гаргаж байна. Мөн булангийн орнуудад экспорт хийж байгаа малын амьдын дундаж жин 13 орчим килограмм багаа. Тэгэхээр намрын болон одоогийн хонины хооронд зөрүү гарч байгаа учраас гологдож байна гэсэн үг.
Газар дээрээс нь очиж авахдаа хонийг 50-65 мянган төгрөгөөр тооцож авна гэж нэгдсэнээр мэдээлсэн. Харин одоо ажиллаж байгаа аймгуудад үйлдвэрлэгч болон малчин хоорондоо тохироод 40, 45 мянган төгрөгөөр авсан цөөн тохиолдол гарсан.
ХХААХҮЯ болон Хөдөө аж ахуйн бирж зохицуулах байдлаар оролцож байна. Үнийн хувьд хоёр тал хоорондоо тохиролцох байдлаар явна. Түүнчлэн малыг үйлдвэрлэгч аж ахуйн нэгж өөрсдийн хөрөнгөөр авах боломжгүй, өндөр эрсдэлтэй гэж үзэж буй учраас Хөдөө аж ахуйн бирж батлан даагчаар орж ирээч гэх хүсэлт тавьсан юм. Үүний дагуу нэг сарын хугацаатай малыг нь аваад нэг сарын дараа төлбөрийг нь барагдуулахаар үйлдвэрлэгч,малчин, бирж гээд гурван талын гэрээ байгуулж хэлцэл хийж байгаа гэлээ
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!