Жил бүр дэлхийн улс орнуудын гадаад паспортын чансааг тодорхойлдог Henley Global байгууллага 2023 оны жагсаалтаа өчигдөр танилцуулжээ.
Жагсаалтыг гаргахдаа IATA (International Air Transport Associaton) байгууллагын тоо баримтыг ашигладаг ба НҮБ-ын гишүүн 193 улсаас гадна Тайвань, Макао, Хонконг, Косово, Палестин, Ватикан гэсэн зургаан бүс нутаг, нийт 199 чиглэлийн хэдэд визгүй зорчих боломжтойгоор нь үнэлдэг.
Энэ оны жагсаалтыг 193 чиглэлд визгүй зорчих эрхтэй Япон улсын паспорт тэргүүлжээ.
Дараа нь тус бүр 192 чиглэлд визгүй аялдаг Сингапур, Өмнөд Солонгосын паспорт жагссан байна.
Араас нь 190 улс, бүс нутагт визгүй зорчдог Герман, Испани, 189-тэй Финланд, Италийн паспортууд удаалсан байна.
Тавдугаар байрыг Австри, Дани, Нидерланд, Шведийн паспортууд хувааж эзэлсэн бол зургаа дугаарт Франц, Ирланд, Португал, Их Британи жагсжээ.
Харин дэлхийн 27 улс, бүс нутагт визгүй зорчих эрхтэй Афганистаны паспорт жагсаалтын сүүлийг энэ жил дахин мушгисан байна.
Монгол улсын гадаад паспортын хувьд 62 чиглэлд визгүй, 165 чиглэлд визтэй зорчдог үзүүлэлтээр чансаагаараа 82 дугаарт эрэмбэлэгджээ.
Монгол улсын паспортын чансаа 2021 онд 87, 2022 онд 85 дугаарт эрэмбэлэгдэж байсантайгаа харьцуулахад өссөн байна. Гэхдээ 2006 онд 72 дугаарт жагсаж байсантайгаа харьцуулахад буурчээ.
Эх сурвалж: Henley Global
