"Ногоон автобус"-ны хэргийг хянан шалгах түр хороо өнөөдөр /2024.05.14/ хаалттай хуралдлаа.
"Ногоон автобус"-ны хэргийг хянан шалгах түр хорооны дарга Ж.Бат-Эрдэнэ, "Түр хорооны сонсголыг товлон зарлах тухай тогтоолыг өнөөдөр баталж, тавдугаар сарын 21, 22-ны өдөр ногоон автобусны хэргийн сонсголыг зохион байгуулахаар тогтлоо. Мөн түр хороонд гэрчээр дуудагдах, хүмүүсийн нэрсийг тогтсон. Улаанбатар хотын замын түгжрэлийг бууруулах сайд асан, засаг дарга асан нарын давхардсан тоогоор 98 гэрч дуудагдана. Сонсголд гурван бүлэг асуудлыг хэлэлцэнэ. Гэрч нарыг танилцуулахад, Түгжрэлийг бууруулах үндэсний хорооны дарга асан Ж.Сүхбаатар, Ц.Батгэрэл, Засаг дарга асан Д.Сумъяабазар, Засаг даргын зөвлөх асан Е.Баатархүү, Ү.Ганболд, Г.Содбаяр гэх мэтчилэн худалдан авах үйл ажиллагаанд оролцсон албан тушаалтнуудыг гэрчээр дуудсан. Мөн гэрчээр “Тэнүүн-Огоо” ХХК-ийн захирал А.Ганхуягийг дуудна" гэв.
